கம்பு கஞ்சியில் ஓமம் சேர்த்து சாப்பிட்டால் நோய் எதிர்ப்பு சக்தி அதிகரிக்கும்...

கம்பு கஞ்சியில் ஓமம் சேர்த்து சாப்பிட்டால் நோய் எதிர்ப்பு சக்தி அதிகரிக்கும்...

உடல் ஆரோக்கியமாக இருக்க வேண்டும் என்று நாம் சாப்பிடும் பல உணவுகள் நமக்கு சுவையாக இருப்பதில்லை. அதனாலேயே ஆரோக்கியமான உணவுகளை மருந்தை போல ஒதுக்குகிறோம். ஆனால் சுவையாகவும் அதேசமயம் ஆரோக்கியமாகவும் இருந்தால் நாம் விரும்பி சாப்பிடுவோம் அல்லவா? அப்படி ஒரு உணவு தான் இந்த கம்பு ஓமம் கஞ்சி. நோயெதிர்ப்பு மண்டலத்தை வலுப்படுத்தும் இந்த கஞ்சியின் நன்மைகளையும் அதன் செய்முறையையும் இங்கே தெரிந்து கொள்ளலாம்.

குளிர்காலத்தில் இயல்பாகவே நோயெதிர்ப்பு ஆற்றல் குறையத் தொடங்கும். இந்த நோயெதிர்ப்பு மண்டலத்தை வலுப்படுத்தி நோய் எதிர்ப்பு ஆற்றலை அதிகரிக்கச் செய்ய கம்புடன் ஓமம், இஞ்சி ஆகியவை சேர்த்து செய்யப்படும் கஞ்சியை நாம் எடுத்துக் கொள்ளலாம். இதில் இரும்புச்சத்து, பொட்டாசியம் ஆகியவை அதிகமாக இருப்பதால் உடலை வலுவாகவும் நோயெதிர்ப்பு மண்டலத்தை ஆரோக்கியமாகவும் வைத்துக் கொள்ள உதவும்.

​நோயெதிர்ப்பு சக்தியை கூட்டும் கம்பு - ஓமம் கஞ்சி :

தேவையான பொருட்கள் :

1/2 கப் கம்பு மாவு,

4 கப் தண்ணீர்,

1 டீஸ்பூன் நெய்,

1/4 கப் வெல்லம் பொடித்தது,

துருவிய இஞ்சி 1 டீஸ்பூன் அல்லது சுக்கு பொடி

1/2 டீஸ்பூன் ஓமம்

​செய்முறை :

ஒரு கடாயில் நெய் ஊற்றி சூடாக்கவும். அதில் துருவிய இஞ்சி, ஓமம் மற்றும் கம்பு மாவு ஆகியவற்றைச் சேர்க்கவும். மாவு நன்றாக வறுபடும்போது நல்ல வாசனையும் நிறமும் மாறும். நல்ல பழுப்பு நிறமாக மாறும் வரை தொடர்ந்து கிளறவும்.

மாவு நன்றாக வேக தேவையான தண்ணீர் ஊற்றுங்கள். மாவை கட்டிகள் இல்லாமல் நன்றாகக் கலந்து கொண்டு, பின் மிதமாக தீயில் 10 நிமிடங்கள் வரை வேகவிடவும்.

தேவைப்பட்டால் தண்ணீரை தனியே சூடாக்கி அதில் ஊற்றி நன்கு கஞ்சியை காய்ச்சிக் கொள்ளலாம்.

​கம்பு - ஓம கஞ்சியின் நன்மைகள் :

கம்பில் இரும்புசச்த்து அதிகமாக இருக்கிறது. அதோடு கம்பில் இருக்கும் ஊட்டச்சத்துக்கள் இதயத்தை ஆரோக்கியமாக வைத்திருக்க உதவுகின்றன.

கம்பில் மெக்னீசியம் மற்றும் பொட்டாசியம் நிறைந்துள்ளது. இது இரத்த ஓட்டத்தை எளிதாக்கி உயர் இரத்த அழுத்தத்தை குறைக்கிறது.

இதில் சேர்க்கப்படும் ஓமம் செரிமான சக்தியை மேம்படுத்தக் கூடியது. அதோடு உடலின் நோய் எதிர்ப்பு சக்தியை அதிகரிக்க உதவுகிறது.

ஒட்டுமொத்தமாக இந்த கஞ்சி இரத்த சர்க்கரை அளவை கட்டுக்குள் வைக்க உதவுகிறது. குடலில் உள்ள நல்ல பாக்டீரியாக்கள் அதிகரித்து, கெட்ட பாக்டீரியாக்கள் குறைய ஆரம்பிக்கும்.

அதேபோல இதில் சேர்க்கப்படும் வெல்லம் செரிமானத்தை மேம்படுத்தும். ஒட்டுமொத்தமாக இந்த கஞ்சி உடலின் 

 ஒட்டுமொத்த நச்சுக்களையும் வெளியேற்றி உடலை சுத்தப்படுத்துகிறது.