பல நோயை விரட்டும் கொய்யா இலை...
விந்தணு குறைபாடு முதல் டெங்கு வரை பல நோயை விரட்டும் கொய்யா இலை...
கொய்யாப்பழம் மலச்சிக்கல் தீர, இரத்த சர்க்கரையைக் கட்டுப்படுத்த சாப்பிடுவது வழக்கம். ஆனால் கொய்யா இலைகளில் பழத்தைக் காட்டிலும் ஏராளமான நோய்களுக்குத் தீர்வு இருக்கிறது. அவற்றைப் பற்றி இங்கே விளக்கமாகப் பார்க்கலாம்.
கொய்யா இலை எனும் அற்புதம் :
எல்லோருக்கும் கொய்யா காய் என்றால் மிகவும் பிடிக்கும். பள்ளிக் காலங்களில் இதை அழகாக வெட்டி உப்புக் காரத்துடன் தொட்டுச் சாப்பிடாதவர்கள் யாரும் இருக்க மாட்டார்கள். இது சுவையில் மட்டுமல்ல ஆரோக்கியத்திலும் தலை சிறந்தது. மிகவும் மலிவாக எப்போதும் கிடைக்கும் பழம் என்றால் அது கொய்யாப்பழம் தான். ஒரு ஆச்சரியமான விஷயம் என்னவென்றால் கொய்யா மரத்தின் இலை, காய், கனி பட்டை இப்படி எல்லாமே நமக்கு பயன்படக் கூடியது.
வீட்டுக்கு ஒரு கொய்யா மரம் வளர்த்தாலே போதும் உங்கள் பிணிகளை ஓட்டி விட முடியும். கொய்யா இலையில் நம் உடலுக்கு தேவையான அத்தியாவசியமான ஊட்டச் சத்துக்கள் அனைத்தும் அடங்கியுள்ளன. காய்களை மட்டும் பறித்து விட்டு இலைகளை பயன்படுத்தாதவர்கள் தயவு செய்து தெரிந்து கொள்ளுங்கள். இந்த கொய்யா இலையில் டீ போட்டு குடித்தாலே நீங்கள் சகல நன்மைகளையும் பெற முடியும்.
ஊட்டச்சத்து அளவுகள் :
கொய்யா இலையில் ஆன்டி ஆக்ஸிடன்ட்கள், ஆன்டி பாக்டீரியல் தன்மை, அழற்சி எதிர்ப்பு தன்மை, டேனின்கள் போன்ற தன்மைகளும் , கரோட்டினாய்டுகள், பாலிபினால்கள், ப்ளோனாய்டுகள் போன்ற கெமிக்கல்களும் அடங்கியுள்ளன. கொய்யா இலை நமக்கு ஒரு வலி நிவாரணி மாதிரி செயல்படுகிறது.
மருந்து மாத்திரைகளை சாப்பிட்டு பக்க விளைவுகளையும் சேர்த்து வாங்கிக் கொள்வதைத் தடுத்து பேசாமல் கொய்யா இலைகளை பயன்படுத்தி பலன் பெறலாம். செரிமான பிரச்சனைகள், வயிற்றுப் போக்கு, கெட்ட கொலஸ்ட்ரால் எல்லாவற்றிற்கும் இந்த ஒற்றை இலை போதும். இதன் மருத்துவ குணத்தை புரிந்த மருத்துவர்கள் இதை மாத்திரை வடிவிலும் மற்றும் டீ வடிவிலும் கொடுக்கின்றனர்.
கொலஸ்ட்ராலை குறைக்கும் டீ :
உங்கள் கொலஸ்ட்ராலை குறைக்க என்னென்னவோ முயற்சி செய்து பார்த்து இருப்பீர்கள். அதற்கு பதிலாக இந்த கொய்யா இலை டீயை 3 மாதங்களுக்கு குடித்து வாருங்கள். உங்களுடைய கெட்ட கொலஸ்ட்ரால், ட்ரைக்ளிசரைடு கொழுப்புகளை குறைத்து இதய நோய்கள் வராமல் தடுக்கிறது என்று ஆராய்ச்சிகள் கூறுகின்றனர்.
கல்லீரலுக்கு சிறந்த டானிக்காக இந்த டீ இருக்கும். கல்லீரலில் கொழுப்புப் படிவதைத் தடுக்கும். அது மட்டுமல்லாமல் நம் உடலில் மிகவும் முக்கியமான செரிமான உறுப்பான கல்லீரலுக்கு கொய்யா இலை டீ டானிக் மாதிரி செயல்படுகிறது.
உடல் எடையை குறைக்க உதவும் எனர்ஜி :
கொய்யா இலைகள் உணவில் உள்ள ஸ்டார்ச் சர்க்கரையாக மாற்றுவதைத் தடுக்கிறது. கல்லீரலில் இருக்கும் போதே கார்போஹைட்ரேட்டை உடைத்து உடம்பு பயன்படுத்தும் கொள்ளும் சேர்மங்களாக மாற்றி விடுகிறது. இதனால் தேவையில்லாமல் கலோரி கூடுவதில்லை. எடையும் கூடுவதில்லை. கார்போ உணவுகள் அதிக அளவில் எடுத்துக் கொள்கின்றவர்கள் இந்த கொய்யா இலை டீயை தினமும் இரண்டு முறை குடித்து வாருங்கள். ரத்தத்தின் சர்க்கரை அளவும் கட்டுக்குள் இருக்கும். கார்போஹைட்ரேட் ஏற்படும் தாக்கத்தினயும் குறைத்து கொலஸ்ட்ராலை எரித்து, எடையைக் குறைக்கும்.
வயிற்று போக்கு :
வயிற்றுப் போக்கு உடையவர்கள் 30 கிராம் கொய்யா இலைகளை ஒரு கைப்பிடிளவு அரிசி மாவுடன், ஒரு கிளாஸ் தண்ணீர் சேர்த்து கொதிக்க வைத்து அந்த நீரை ஒரு நாளைக்கு 2 முறை குடித்து வாருங்கள். வயிற்றுப் போக்கு குறைந்து விடும். இதுவே டிஸ்சென்ட்ரி இருப்பவர்கள். கொய்யா செடியின் வேர்கள் மற்றும் இலைகளை வெட்டி 90 டிகிரி செல்சியஸ் வெப்பநிலையில் 15 நிமிடங்கள் தண்ணீரில் கொதிக்க வையுங்கள். பின்னர் வடிகட்டி குடித்தால் டிஸ்சென்ட்ரி சரியாகி விடும். இவை வயிற்றில் இருக்கும் நொதிகளை சரி செய்து செரிமான பிரச்சனைகளை சரி செய்து விடுகிறது.
நீரிழிவு நோயை கட்டுப்படுத்த :
ஜப்பானின் யாகுல்ட் சென்ட்ரல் இன்ஸ்டிடியூட் நடத்திய ஆய்வின்படி, கொய்யா இலைகளால் தயாரிக்கப்படும் தேநீர் ஆல்பா-குளுக்கோசைடேஸ் என்சைம் செயல்பாட்டைக் குறைப்பதன் மூலம் டயாபடீஸ் நோயாளிகளின் இரத்த சர்க்கரை அளவை கட்டுக்குள் கொண்டு வருகிறது. மேலும் உடல் சுக்ரோஸ், மால்ட்டோஸ் போன்ற இரத்த சர்க்கரையை கூட்டும் பொருட்கள் உறிஞ்சப்படுவதை தடுக்கிறது. எனவே இந்த அற்புதமான கொய்யா இலை டீயை 10-12 வாரங்கள் குடித்து வந்தால் இரத்த சர்க்கரை அளவை பராமரிக்க முடியும்.
சீரண சக்தியை மேம்படுத்த :
வயிற்றில் வளரும் பாக்டீரியாக்களை செரிமான நொதிகளை உற்பத்தி செய்வதன் மூலம் தடுக்கிறது. இதனால் நச்சு விளைவிக்கும் குடல் பாக்டீரியாக்கள் கொல்லப்படுகின்றன. செரிமான நொதிகளின் உற்பத்தியை தூண்டி செரிமானத்தை மேம்படுத்துகிறது. உங்களுக்கு உணவு நச்சாக மாறும் போதோ, குமட்டல், வாந்தி போன்ற பிரச்சினைகள் ஏற்பட்டால் கொய்யா இலை டீ போட்டு குடியுங்கள் சரியாகி விடும். வயிற்று வலி வந்தால் கூட 6-7 கொய்யா இலைகளை 1.5 லிட்டர் நீரில் போட்டு கொதிக்க வைத்து ஒரு நாளைக்கு 2-3 வேளை குடித்து வாருங்கள். வலி படிப்படியாக குறைந்து விடும்.
டெங்கு காய்ச்சலை விரட்டும் சூப்பர் டீ :
டெங்கு காய்ச்சல் பரவுகின்ற சமயத்தில் கொய்யா இலை டீ உங்களுக்கு சிறந்தது. ஏனெனில் கொய்யா இலைகளில் டெங்கு காய்ச்சலை குணப்படுத்தும் குணம் உள்ளது. டெங்கு காய்ச்சலால் உங்க பிளேட்லட்டுகள் குறைந்து உயிருக்கே ஆபத்து நேரிட வாய்ப்புள்ளது. அந்த மாதிரியான சமயங்களில் கொய்யா இலை டீ பிளேட்லட்டுகள் எண்ணிக்கையை அதிகப்படுத்துகின்றன. இதற்கு 8-9 கொய்யா இலைகளை 5 கப் தண்ணீரில் போட்டு பாதியாக வற்றும் வரை சூடுபடுத்த வேண்டும். ஆறிய பிறகு வடிகட்டி டெங்கு காய்ச்சலால் பாதிக்கப்பட்ட நபருக்கு ஒரு நாளைக்கு 3 வேளை கொடுத்து வாருங்கள் அறிகுறிகள் குறையும்.
சருமம் வயதாகுவதை தடுக்கும் இயற்கை க்ரீம் :
நம் முகத்தில் பருக்கள், கரும்புள்ளிகள் இருந்தால் முக அழகே கெட்டு விடும். இதை போக்க நீங்கள் க்ரீம்கள் எல்லாம் தடவ வேண்டாம். சில கொய்யா இலைகளை மிக்ஸியில் போட்டு அரைத்து பேஸ்ட்டாக்கி முகத்தில் அப்ளே செய்து வாருங்கள். இதன் ஆன்டி செப்டிக் தன்மை முகப்பருவிற்கு காரணமான பாக்டீரியாக்களை கொல்கிறது. சில வாரங்கள் இதை செய்தால் மாசு மருவற்ற முகத்தை பெறுவீர்கள்.
நமது சருமத்தின் தன்மை, சரும செல்கள் இறக்கும் போது வயதாக ஆரம்பித்து விடும். இந்த பிரச்சினையை சரிசெய்ய கொய்யா இலைகள் உதவுகின்றன. இந்த இலையில் உள்ள ஆன்டி ஆக்ஸிடன்கள் சரும செல்கள் இறப்பதை தடுத்து புத்துணர்ச்சி ஊட்டுகிறது. இதனால் சருமத்தின் தன்மை, வடிவம் அப்படியே இருக்கிறது. இதனால் நாமும் இளமையாக தெரிவோம். சருமம் தொய்வடைவதை இறுக்குகிறது. எனவே கொய்யா இலை டீ குடித்தவர்களுக்கு சீக்கிரம் முதுமை எட்டுவதில்லை.
கூந்தல் வளர்ச்சியை ஊட்டும் டானிக் :
நமது கூந்தல் வளர்ச்சிக்கு தேவையான போஷாக்குகள், ஊட்டச்சத்துக்கள் எல்லாம் கொய்யா இலையில் இருக்கின்றனர். எனவே இந்த கொய்யா இலை சாற்றை உங்கள் கூந்தலில் அப்ளே செய்து காய வைத்து பின் அலசி வாருங்கள். மென்மையான அடர்த்தியான கூந்தலை பெறுவீர்கள்.
ஒரு லிட்டர் தண்ணீரில் 20 முதல் 30 கொய்யா இலைகளைப் போட்டு நன்கு கொதிக்க வைத்து ஆறவிடுங்கள். நன்கு ஆறிய பிறகு அந்த நீரை ஒரு ஸ்பிரே பாட்டிலில் எடுத்து தலைமுடி மற்றும் வேர்க்கால்களில் படும்படியாக ஸ்பிரே செய்யலாம். அல்லது நேரடியாக தலையை அலசப் பயன்படுத்துங்கள். இது வேர்க்கால்களைத் தூண்டி, முடியின் வளர்ச்சியை ஊக்குவிக்கும்.
விந்தணுக்கள் உற்பத்தியை அதிகரிக்க :
நிறைய ஆண்களுக்கு போதுமான விந்தணுக்கள் இல்லாததால் கருத்தரிக்கும் வாய்ப்பு குறைவாக இருக்கும். இதனால் கருத்தரிப்பு தள்ளிப் போட்டுக் கொண்டே வரும். ஆண்கள் தங்கள் விந்தணுக்கள் உற்பத்தியை பெருக்க கொய்யா இலைகளை டீ போட்டு குடிக்கலாம். இது விந்தணு உற்பத்தியை பெருக்கி சீக்கிரமே கருத்தரிக்க உதவுகிறது.
விந்தணுக்களின் எண்ணிக்கை மட்டுமல்லாது, விந்து உயிரணுக்கள் வலிமை இல்லாமல் இருந்தாலும் இந்த கொய்யா இலைகளை டீ போட்டு தினமும் இரவில் தூங்கச் செல்வதற்கு முன் குடித்து வருவது நல்லது. உடல் பதட்டம் இல்லாமல் இருக்கின்ற வேளையில், உயிரணுக்கள் உற்பத்தி சீராகத் தூண்டப்படுவதற்கு உங்கள் உடல் ஒத்துழைக்கும். விந்து உயிரணுக்களின் எண்ணிக்கையும் சீராக அதிகரிக்கவும் வலிமையாகவும் தொடங்கும்.
கொய்யா இலை டீ தயாரிக்கும் முறை :
தேவையான பொருட்கள் :
கொய்யா இலை :5
தண்ணீர்-தேவைக்கேற்ப
தேயிலை தூள் சிறிதளவு
கருப்பட்டி
தயாரிக்கும் முறை::
ஒரு பாத்திரத்தில் தண்ணீர் ஊற்றி நன்றாக கொதிக்க விடுங்கள் பிறகு அதில் சிறிது தேயிலை தூள், கொய்யா இலைகளை போட்டு மறுபடியும் கொதிக்க விடவும்.
கொய்யா இலை சாறு நன்றாக இறங்க வேண்டும்.
பிறகு அதில் கருப்பட்டி அல்லது தேன் சேர்த்து கரையும் வரை கொதிக்க விடுங்கள்.
பிறகு இந்த தண்ணீரை வடிகட்டி குடித்து வாருங்கள். ஆரோக்கியமான கொய்யா இலை டீ ரெடி.