இஞ்சி எண்ணெயில் மருத்துவ குணங்கள் என்னென்ன... என்னென்ன பிரச்சினைக்கு பயன்படுத்தலாம்!!

இஞ்சி எண்ணெயில் மருத்துவ குணங்கள் என்னென்ன... என்னென்ன பிரச்சினைக்கு பயன்படுத்தலாம்!!

இஞ்சி காலங்காலமாக நம்முடைய பாரம்பரிய மருத்துவத்தில் பயன்படுத்தப்பட்டு வருகிறது. ஆன்டி- வைரல், ஆன்டி பாக்டீரியல் பண்புகள் கொண்ட இஞ்சி பல்வேறு மருத்துவ குணங்களைக் கொண்டிருக்கிறது. அதேபோல இஞ்சி எண்ணெயிலும் பல மருத்துவ குணங்கள் நிறைந்திருக்கின்றன. அவை என்னென்ன என்று இங்கே பார்க்கலாம்.

இஞ்சி நம்முடைய பெரும்பாலான சடையலில் பயன்படுத்துகிறோம். டீயில் சேர்த்து பயன்படுத்துகிறோம். ஆனால் இஞ்சி ஆயிலைப் பற்றி நாம் பெரிதாக தெரிந்து கொள்ளவோ பயன்டுத்தவோ செய்வதில்லை. இவ்வளவு நாள் தெரியாமல் இருந்திருக்கலாம். ஆனால் இப்போது தெரிந்து கொள்ளுங்கள்.

​இஞ்சி எண்ணெய் (ginger oil) :

இஞ்சி எண்ணெயை பற்றி இதற்கு முன்பு உங்களுக்கு எதுவும் தெரியாமல் இருந்தால் நீங்கள் தெரிந்து கொள்ள இதுதான் சரியான நேரம்.

இஞ்சி என்று அழைக்கப்படும் ஜிங்கிபர் அஃபிசினேல் மூலிகையின் வேரில் இருந்து தான் இந்த இஞ்சி அத்தியாவசிய எண்ணெய் (ginger essential oil) அல்லது இஞ்சி வேர் எண்ணெய் தயாரிக்கப்படுகிறது.

​பாரம்பரிய மருத்துவத்தில் இஞ்சி எண்ணெய் :

பாரம்பரிய மருத்துவத்தில் குறிப்பாக, ஆயுர்வேத மருத்துவத்தில் இஞ்சி எஎண்ணெய் பயன்படுத்தப்படுகிறது. இதிலுள்ள ஆன்டி - இன்பிளமேட்டரி பண்புகள் உடலில் நோய்த் தொற்றுக்கள் ஏற்படாமல் பாதுகாக்கவும் பல்வேறு நன்மைகளை செய்யவும் உதவியாக இருக்கிறது.

இஞ்சியினுடைய வேரிலிருந்து எடுக்கப்படும் எண்ணெய் அழற்சி, காய்ச்சல், சளி, சுவாசக் கோளாறுகள், குமட்டல், மாதவிடாய் பிரச்சினைகள், வயிற்றுக் கோளாறுகள், மூட்டுவலி மற்றும் வாத நோய்களுக்கு சிகிச்சையளிக்க நாட்டுப்புற மருத்துவத்தில் ஆயிரக்கணக்கான ஆண்டுகளாகப் பயன்படுத்தப்படுகிறது.

​வலிகளைப் போக்க உதவும் இஞ்சி எண்ணெய் :

இஞ்சி எண்ணெயின் மிக முக்கியமான பயன்பாடு என்ன தெரியுமா? உடலில் ஏற்படுகின்ற கடுமையான வீக்கத்தைக் குறைப்பதாகும்.

இஞ்சி எண்ணெயில் உள்ள ஆன்டிஆக்ஸிடன்ட்கள், அழற்சி எதிர்ப்பு மற்றும் பாக்டீரியா எதிர்ப்பு மூலக்கூறுகள் இருப்பதால், இஞ்சி கடுமையான வீக்கத்திலிருந்து விடுபட உதவும் என்று ஆய்வுகள் குறிப்பிடுகின்றன.

அதோடு தலைவலி, உடல் வலி, தசைவலி உள்ளிட்ட வலிகைளைப் போக்கவும் குறிப்பாக மூட்டு வலியில் இருந்து நிவாரணம் பெறவும் இந்த இஞ்சி எண்ணெயை நாம் பயன்படுத்தலாம்.

​சருமத்தை மேம்படுத்த இஞ்சி ஆயில் :

இஞ்சி எசன்ஷியல் ஆயில் சருமத்தில் தடவும்போது சருமத் தடிப்புகள், சருமம் சிவந்து போதல் போன்ற பிரச்சினைகளைக் குறைக்கிறது.

சருமத்தில் ஏற்படும் பாக்டீரியா தொற்றுக்களை சரிசெய்வதோடு, சரும சேதம் மற்றும் வயதானதை தோற்றத்தையும் தடுத்து இளமையாக வைத்திருக்க உதவுகிறது.

சருமத்தின் நிறத்தை மேம்படுத்த உதவும் இந்த இஞ்சி எண்ணெய் சருமத்தில் மிகச்சிறந்த ஆன்டி - செப்டிக்காகவும் பயன்படுகிறது. இதனால் இது சருமத்தில் உள்ள நச்சுத் தன்மையைக் குறைக்க உதவுகிறது.

​செரிமான பிரச்சினைகளை போக்க இஞ்சி எண்ணெய் :

இஞ்சியில் உள்ள வைட்டமின்கள், தாதுக்கள் மற்றும் மினரல்கள் வயிற்றுப் பகுதிக்கான சிறந்த மசாஜ் ஆயிலாகப் பயன்படுத்த முடியும்.

இஞ்சி எண்ணெய் வயிற்றில் (குடலில்) உள்ள நச்சுகளை நீக்க உதவுகிறது. அதோடு செரிமான ஆற்றலையும் மேம்படுத்துகிறது.

வயிறு மற்றும் குடல் கோளாறுகளை நீக்குவதோடு பசியை அதிகரிக்கச் செய்கிறது.

அதேபோன்று ஜிஞ்சர் எசன்ஷியல் ஆயிலில் செய்யப்படும் அரோமாதெரபி குமட்டல், வாந்தி ஆகியவற்றை தடுத்து நிறுத்துகிறது.

​தலைமுடி,வேர்க்கால்களை சுத்தப்படுத்தும் இஞ்சி எண்ணெய் :

இஞ்சி எண்ணெய், நம்முடைய தலைமுடி மற்றும் உச்சந்தலையில் அப்ளை செய்து சிறிது நேரம் மசாஜ் செய்யும் போது வலுவிழந்த மயிர்க்கால்களை வலிமைப்படுத்துகிறது.

அதோடு உச்சந்தலையில் ஏற்படும் அரிப்பு மற்றும் பொடுகை நீக்கும் தன்மை கொண்டது. உச்சந்தலையில் ரத்த ஓட்டத்தை அதிகரிக்கச் செய்து முடியின் வளர்ச்சியைத் தூண்டுகிறது.